Рома Свечнікаў


“Рома едзе”


Вільня: 34mag.net / “Логвінаў”

Пра кнігу:


1 ліпеня 2012 года дваццацігадовы беларускі хлопец Рома Свечнікаў кінуў вучобу ва ўніверсітэце, развітаўся з сям’ёй, сябрамі і ўтульным пакоем у мінскім чатырохпавярховіку ды выправіўся ў бестэрміновае кругасветнае падарожжа. З сабой ён узяў заплечнік з рэчамі першай неабходнасці, люстраны фотаапарат, маленькі лэптоп і нешта каля двухсот даляраў наяўнымі. На працягу ўсяго свайго трыпу Рома літаральна ў дарозе на каленцы пісаў для часопіса 34mag.net свае нататкі ў стылі рэаліці, мантаваў кароткія відосы-эксперыменты і рабіў атмасферныя фоткі.

Гэтае электроннае выданне — першы том Ромавых нататак, першая палова планеты: ад Беларусі да ЗША праз Грузію, Арменію, Іран, Азербайджан, Расію, Манголію, Кітай, Лаос і Тайланд.

Ад главы да главы адчуваецца, як змяняецца герой, як сталеюць яго стыль і рытм, як узрастае складанасць пастаўленых задач, змяняецца светаадчуванне, грубее і гартуецца характар, разбураюцца старыя ўяўленні пра свабоду, грамадства, любоў і адзіноту.

Гэта шматслойная кніга пра сілу і смеласць, веру і мары, уяўнае і рэальнае, людзей і грамадства, межы і космас. І гэта дакладна наша кніга, бо мы прызвычаіліся акопвацца ў сваім кантэксце, хавацца ў ракавіну і адкладаць на чорны дзень. І гэтага трэба пазбаўляцца.

Пра аўтара:


Рома Свечнікаў нарадзіўся ў Мінску. Адзін са стваральнікаў урбан-арт групоўкі Lena Krasit, вядомай па шэрагу партызанскіх мастацкіх актаў у Мінску. Ва ўзросце 19 год здзейсніў падарожжа ў Кітай аўтаспынам з бюджэтам 200 даляраў на два месяцы. Пра свае прыгоды і цяжкасці звышбюджэтнага падарожжа Раман вёў папулярны блог. Гэтыя праекты сталіся добрай практыкай перад стварэннем мультымедыйнага праекту «Рома едзе» для часопіса 34mag.net.

Ва ўзросце 20 год кінуў універсітэт і выправіўся ў бестэрміновае кругасветнае падарожжа. Свае ўражанні занатоўваў у форме тэкставых нататак, відэаролікаў і фотарэпартажаў для часопіса 34mag.net. За два з паловай гады праехаў Каўказ, Іран, Расію, Кітай, Паўднёва-Усходнюю Азію, Паўночную, Цэнтральную і Паўднёвую Амерыкі. За свой артыкул «Рома ў Манголіі» атрымаў галоўную прэмію на конкурсе «Вольнае слова» Беларускай асацыяцыі журналістаў у намінацыі «Дэбют».

У лістападзе 2014 года па завяршэнні кругасветкі Свечнікаў паспяхова вярнуўся ў Мінск.

Кнігу “Рома едзе” можна прачытаць тут.

Вынікі апошніх гадоў:
2016 2015 2014 2013
Арганізатары: